Na Mwandishi Wetu, Mtanzania Digital
Watumishi wa Ofisi ya Waziri Mkuu Kazi, Vijana, Ajira na Wenye ulemavu na taasisi zake ikiwemo OSHA, wameshiriki katika mbio za Kimataifa za Kili Marathon Mkoani Kilimanjaro wakiongozwa na Katibu Mkuu wa Ofisi hiyo, Prof. Jamal Katundu katika mbio za Kilomita 21 na Kilomita 5.
Akizungumza na wanahabari Mkurugenzi Msaidizi wa Utawala na Rasilimali watu wa Ofisi ya Waziri Mkuu, Kazi, Vijana, Ajira na Wenye ulemavu, Edith Simtengu amesema lengo kubwa la kushiriki katika mbio hizo ni kutekeleza sera ya kupambana na magonjwa sugu yasiyoyakuambukiza hivyo kuwafanya wafanyakazi wawe na afya njema na kuhamasika katika utekelezaji wa majukumu yao ya kila siku.
“Tumekuwa tukishiriki mbio hizi za Kili Marathon mara kwa mara lakini awamu hii tumeona nivyema Ofisi ya Waziri Mkuu pamoja na taasisi zake tushiriki kwa pamoja ikiwa lengo ni kutekeleza sera yetu ya kupambana na magonjwa yasiyoambukiza pamoja na kujenga uhusiano mwema mahali pa kazi,” alisema Edith.
Kwa upande wake Mkurugenzi wa Huduma za Biashara wa OSHA, Netiwe Mhando ambaye pia alikuwa ni miongoni mwa washiriki wa mbio za Km 21 amesema kuwa ushiriki wa mbio hizo unatokana na majukumu ya msingi yanayosimamiwa na taasisi ya OSHA ikiwemo kuimarisha usalama na afya za wafanyakazi.
“Tunaposhiriki katika michezo kama hii maana yake tunahimiza wafanyakazi kujiweka katika hali nzuri ya kiafya hivyo kuilinda nguvu kazi ya taifa nashauri taasisi zingine kuhamasika katika kushiriki michezo na mazoezi mengine ili kuwasaidia wafanyakazi kujiweka imara, kuhamasisha ushirikiano na pia kuleta ari ya kufanya kazi katika maeneo yao ya kazi,” alisema Mhando.
Katika mbio hizo Katibu Mkuu Prof. Katundu pamoja na watumishi wengine wa Ofisi ya Waziri Mkuu walifanikiwa kumaliza mbio za Km 21 huku watumishi wengine wakikimbia mbio za Km 5.
Mwaka huu mbio hizi za Kili Marathon zinatimiza miaka 20 tangu kuanzishwa kwake mwaka 2002 zikikutanisha washiriki kutoka maeneo mbalimbali ya ndani na nje ya nchi katika mbio za kilometa 42, km 21 na Km 5.
