Na Mwandishi Wetu, Pwani
Naibu Katibu Mkuu Ofisi ya Waziri Mkuu Sera, Bunge na Uratibu, Kaspar Mmuya amekemea tabia ya wachukua taarifa wasio waadilifu wanaochukua taarifa za kijiografia (GPS) za sehemu moja kutolea taarifa kwenye eneo jingine nakwamba jambo hilo linaharibu kazi data na linasababisha mfumo kutoa taarifa zisizosahihi.
“Watendaji mkagaue na kujiridhisha kuhusu taarifa za kijiografia (GPS), hasa pale inapotokea taarifa hizo kufanana eneo moja na jingine,” amesema Mkuu Mmuya.
Mmuya ameyasema hayo Mei 17, mwaka huu katika ziara yake ya kukagua utekelezaji wa operesheni ya anwani za makazi katika Wilaya ya Kilwa na Rufiji mkoani Pwani nakusisitiza kuwa lazima taafa za kijiografia zikusanywe kwa kila nyumba ambayo inaenda kutambuliwa kwa sababu taarifa hizo zinatofautiana.
“Ninawapongeza wananchi wa Kilwa na Rufiji kwa uelewa na muitikio wao katika kutekeleza Operesheni ya anwani za makazi na umuhimu wake kwa Sensa ya watu na makazi. Tuendelee kuhamasisha wananchi juu ya umuhimu wa operesheni ya anwani za makazi.
“Pia ninatoa wito kwa wananchi wote, kujiwekea namba ya kudumu kwenye mageti au milango ni jukumu lao,” amesema Mmuya.
Akihitimisha Injinia wa Wakala wa Barabara za mjini na vijijini (TARURA), Agatha Mtwangambate amesema kwa awamu ya kwanza  idadi ya vibao vya barabara ni kwa ajili ya barabara zote zilizosajiliwa, na vitawekwa katika mwanzo wa barabara na mwisho wa barabara.
“Kadri operesheni ya anuani za makazi inavyoendelea tutaanza kuzitambua barabara mpya na kuziwekea vibao,” amesema.
