Maalim Seif atua Uingereza kuishtaki Serikali

Maalim Seif Sharif Hamad
Maalim Seif Sharif Hamad
Maalim Seif Sharif Hamad

Na Mwandishi Wetu, Dar es Salaam

UJUMBE wa Katibu Mkuu wa Chama cha Wananchi (CUF), Maalim Seif Sharif Hamad ukiongozwa na maofisa wa ngazi ya juu wa Umoja wa Vyama vya Kiliberali Duniani (Liberal International (LI)) ulianza ziara ya Ulaya kwa kutembelea makao makuu ya LI mjini London, Uingereza juzi.

Ujumbe wa CUF ulieleza wasiwasi wake kuhusu ongezeko la vitendo vya ukiukaji wa haki za binadamu ‎visiwani Zanzibar tangu kufanyika uchaguzi wa marudio ambao CUF waliususa, Machi 2016.

Vitendo hivyo ni pamoja na kamata kamata bila kufungua kesi na kuminywa   uhuru wa kutoa maoni.

Akiwaeleza wawakilishi wa LI namna CUF wanavyoendesha harakati za upinzani kwa njia ya demokrasia na amani ingawa waliporwa ushindi na serikali ya Tanzania Oktoba 2015, Seif Sharif Hamad alisema:

“Kinachotokea leo (juzi) hii ni ukandamizaji; serikali inahakikisha CUF hawafanyi kazi”.

Katibu Mkuu wa CUF alitoa mwito kwa jumuiya ya kimataifa kutambua na kuzuia uwezekano wa kutokea  machafuko kutokana na kuminywa  demokrasia katika eneo hilo ambalo tayari hali ni tete.

Katibu Mkuu wa LI, Emil Kirjas alieleza kuwaunga mkono wenzao wa Tanzania akisema kwamba, “hamko pekee yenu katika harakati hizi.”

Aliongeza:  “Sote katika jumuiya ya vyama vya kiliberali duniani tutafanya kila linalowezekana na kwa kadiri ya uwezo wetu kuhakikisha  maisha yenu yanalindwa na  matakwa ya walio wengi visiwani Zanzibar mwishowe yanaheshimiwa na   Chama cha Wananchi, chini ya Maalim Seif, kinaunda serikali ya maendeleo na ustawi wa Zanzibar.”

CUF ni mwanachama wa LI tangu mwaka 1994, umoja ulionzishwa mwaka 1947 ukiundwa na vyama zaidi ya 100 vya kiliberali duniani. Umoja huo pia unajumuisha marais na mawaziri wakuu wanane (8) wa nchi mbalimbali.

LEAVE A REPLY

Please enter your comment!
Please enter your name here