33.2 C
Dar es Salaam
Sunday, September 19, 2021

Kumbilamoto aipongeza Isimilla kwa huduma bora

Na Mwandishi Wetu, Mtanzania Digital

Meya wa Jiji la Dar es Salaam, Omary Kumbilamoto ameipongeza Zahanati ya Isimilla kwa kutoa huduma bora katika Kata ya Mchikichini ambayo haina kituo cha umma.

Meya wa Jiji la Dar es Salaam, Omary Kumbilamoto, akikata utepe wakati wa uzinduzi wa Zahanati ya Isimilla iliyopo Kata ya Mchikichini wilayani Ilala. Kulia ni Diwani wa Kata ya Mchikichini, Azim Khan.

Ametoa pongezi hizo wakati wa uzinduzi wa zahanati hiyo uliokwenda sambamba na zoezi la uchangiaji damu kwa ajili ya kusaidia wagonjwa mbalimbali wenye uhitaji.

“Niwapongeze kwa huduma nzuri mnazozitoa mmefanya kazi ambayo tulitakiwa tufanye sisi kama jiji kwa sababu Kata ya Mchikichini haina zahanati. Pia tunashukuru mmeisaidia serikali katika changamoto ya ajira,” amesema Kumbilamoto.

Aidha ameahidi kuwa watahakikisha kata hiyo inapata kituo cha umma ili kuwapunguzia adha wananchi ya kwenda kupata huduma katika maeneo ya mbali.

Naye Diwani wa Kata ya Mchikichini, Azim Khan, amesema kata hiyo ina mitaa mitatu ya Ilala Kota, Msimbazi Bondeni na Misheni Kota na kuomba wajengewe zahanati au kituo cha afya kinachomilikiwa na serikali.

“Tunawashukuru Isimilla kwa kuwapa huduma wananchi wetu lakini bado kilio chetu ni kupata zahanati yetu, wananchi wetu wengi wanakosa huduma…kuna wananchi wana maisha duni hawana sehemu ya kukimbilia iliyo karibu,” amesema Khan.

Mganga Mfawidhi wa Zahanati ya Isimilla, Dk. Alison Mjema, akimuonyesha Meya wa Jiji la Dar es Salaam, Omary Kumbilamoto mashine mbalimbali zilizomo katika chumba cha maabara. Katikati ni wataalam wa maabara wa zahanati hiyo.

Kwa upande wake Mganga Mfawidhi wa Zahanati ya Isimilla, Dk. Alison Mjema, amesema zahanati hiyo ilianzishwa mwaka 2019 ambapo imekuwa ikitoa elimu ya afya, upimaji magonjwa mbalimbali na tiba, huduma ya mama na mtoto na ushauri nasaha.

Aidha amesema zahanati hiyo imetoa ajira kwa Watanzania 18 katika kada mbalimbali za afya na malengo yao ni kuwa na kituo cha afya.

“Pamoja na mafanikio tuliyoyapata pia tunakabiliwa na changamoto kadhaa hasa uhaba wa eneo. Hivyo, tunaomba tusaidiwe kama kuna jengo la serikali hata kama ni kwa kulikarabati au kuchangia gharama kadhaa ili tuweze kupanua huduma zetu,” amesema Dk. Mjema.

Wakazi wa Jiji la Dar es Salaam wakichangia damu wakati wa uzinduzi wa Zahanati ya Isimilla.

Kwa mujibu wa Dk. Mjema, kwa mwezi zahanati hiyo inahudumia zaidi ya wagonjwa 1,000 ambao wanatoka Kata za Mchikichini, Kariakoo, Gerezani na maeneo mengine ya Jiji la Dar es Salaam.

Related Articles

LEAVE A REPLY

Please enter your comment!
Please enter your name here

Stay Connected

66,457FansLike
156,882FollowersFollow
518,000SubscribersSubscribe

Latest Articles