Na ASHA BANI, Dar es Salaam
BAADA ya Serikali kutangaza kufuta ada ya mwaka ya leseni ya magari na badala yake ada hiyo ilipwe mara moja tu gari linaposajiliwa, magari yafurika gereji kwa matengenezo yaweze kuingia barabarani mwaka wa fedha 2017-2018 ukianza.
MTANZANIA limeshuhudia na kuzungumza na baadhi ya mafundi wa gereji mbalimbali za Dar es Salaam juzi na jana, walioeleza maoni yao kuhusu msongamano huo.
Akizungumzia hilo fundi Mohamed Omary wa gereji ya Magomeni Mapipa alisema walikuwa wamekaa bila ya kazi lakini kwa sasa wameelemewa.
Alisema wanapokea magari mabovu ambayo anaamini yalikuwa yameegeshwa siku nyingi kutokana na ubovu huo na kushindwa kulipia ada ya mwaka lakini kwa sasa yataingia barabarani.
Ramadhan Juma wa Yombo Vituka alisema katika kituo chake cha kuziba pancha matairi, anapokea matairi mengi ya kuweka viraka na mengine kuyajaza upepo na akiwauliza wateja wake wengi wanamjibu yalikuwa hayatumiki.
“Kuna mteja mmoja alikuja hapa na nilipozungumza naye alinambia gari lilikuwa na deni limefika hadi milioni tatu lakini kutokana na serikali kufuta deni hilo hana budi kutengeneza na kuliingiza barabarani kuendelea na shughuli zake ,’’alisema Jumja.
Nassoro Yassin wa Buguruni Malapa naye amelieleza gazeti hili kuwa wanapokea magari mengi kwa sasa tofauti na ilivyokuwa awali.
“Na tukitupia macho kwenye leseni tunaona imekwisha kitambo ndipo tunagundua kuwa kumbe tangazo la kuondoa ada imewaibua wengi,’’ alisema Yassin.
Hata hivyo, baadhi ya watumiaji wa magari wameingiwa na wasiwasi kwamba kutakuwa na mrundikano wa magari barabarani ambayo yatachangia kuongezeka foleni jijini.
Hivi karibuni Waziri wa Fedha na Mipango, Dk. Philipo Mpango, wakati akiwasilisha bajeti ya mwaka 2017-2018 bungeni Dodoma, alisema baada ya kufutwa kwa ada hiyo itaendelea kulipwa kupitia ushuru wa petrol ina dizeli na mafuta ya taa.
Alisema wakati wa usajili mara ya kwanza ongezeko litakuwa ni Sh 50,000 kwa gari yenye ujazo wa wa injini 501 -1500 CC yaani kutoka kiwango cha sasa cha Sh 150,000 ikiwa ni ongezeko la Sh 50,000.
Gari lenye ujazo wa injini ya 2501 cc na zaidi kutoka kiwango cha sasa cha Sh 250,000 hadi Sh 300,000 kwani ongezeko la Sh 50,000.
