NA JEREMIA ERNEST
MSANII mkongwe wa filamu nchini, Muksin Awadhi ‘Dr Cheni’, anatarajiwa kuwa Jaji Mkuu katika usaili wa washiriki wa Miss Ilala mwaka huu.
Usaili huo utafanyika mwishoni mwa wiki hii katika hoteli ya Lamada, huku warembo 15 wakitarajia kushindana.
Akizungumza na MTANZANIA jana, mratibu wa shindano hilo, Lucas Rutainurwa, alisema usaili huo utafanywa kwa umakini ili kuwapata wawakilishi sahihi.
“Tutafanya usaili siku ya Jumamosi, Jaji Mkuu atakuwa Dr Cheni, huyu ni mdau mkubwa wa urembo hapa nchini, ataongozana na baadhi ya mastaa wengine ili kutenda haki,” alisema Lucas.
Aliongeza kuwa mwaka huu kamati yao imejipanga kuboresha zawadi, pia kumsaidia mrembo atakayepatikana kutwaa taji la Taifa.
