Kampala, Uganda
Dereva wa Mbunge Kyadondo Mashariki, Robert Ssentamu maarufu Bobi Whine ameripotiwa kufariki dunia baada ya kupigwa risasi katika mji wa Arua nchini Uganda.
Dereva huyo anaejulikana kama Kawooya Yasin, alipigwa risasi na kuuawa Jumatatu jioni akiwa katika gari eneo la Hoteli ya Pacific baada ya kutokea vurugu katika kampeni za uchaguzi mdogo katika Manispaa ya Mji wa Arua.
Akithibitisha tukio hilo Bobi ameandika katika ukurasa wake wa Twitter kuwa dereva wake ameuawa na polisi wakidhani ni yeye.
“Askari wamempiga risasi dereva wangu wakidhani ni mimi, hoteli nilipo imezingirwa na askari na wanajeshi wa SFC,” ameandika Bobi Whine.
Bobi Whine yuko katika Mji wa Arua kwa ajili ya kufanya kampeni za mwisho katika kumuunga mkono mgombea ubunge wa ene hilo, Kassiano Wadri.
Polisi hawajathibitisha kuhusika na tukio hilo.
