Na Mwandishi Wetu, Dar es Salaam
Mamlaka ya Maji Safi na Maji Taka (DAWASA), Wilaya ya Kibamba imewaondoa hofu wananchi wa Mbezi Malamba mawili eneo la Kwembe Mapakani kuwa ifikapo Juni 30, mwakani, kila mwananchi atakuwa amepata huduma ya maji safi na salama nyumbani kwake.
DAWASA imekiri kuwa ni kweli eneo hilo linachangamoto ya kukosa maji kwa kipilndi kirefu lakini tayari wameshaanza kutandika mabomba ya inchi 4, 6 na 9 kuanzia bomba kubwa liliopo mbezi na kuelekea katika eneo hilo ili kuwaondolea wananchi matatizo yanayowakabili.
Akizungumza na MTANZANIADIGITAL jana Desemba 18, Meneja wa DAWASA Wilaya ya Kibamba Injinia Pascal Fimbuka alisema, DAWASA inafanya kazi hatua kwa hatua hivyo hivi sasa ni zamu ya Kwembe Mpakani kupata maji.
“Serikali ya awamu ya tano inatuelekeza kuwahudumia wananchi wote bila ya kuwabagua kwa dini au chama hivyo ifikapo Juni 30, mwakani kila mwananchi wa kwembe atakuwa amepata huduma ya maji.”alisema Injinia Fimbuka.
Alisema mradi huo wa kutandika mabomba umeanza Desemba mwaka huu na wafaidika wa mradi huo ni baadhi ya maeneo ya Mbezi ikiwemo Mpigi Magoe, Msakuzi, Kingazi A na B .
“DAWASA tumejipanga kuwaondolea changamoto za maji watanzania hivyo kila mtanzania anayeishi Dar es Salaam ajue ni lazima atapata huduma ya maji “alisema.
