Tunu Nassor-Dar es Salaam
MAMLAKA ya Majisafi na Majitaka Dar es Salaam (Dawasa) imewataka wamiliki na wasambazaji wa maji ya kisima kujitokeza ili wapewe leseni na cheti cha kusambaza baada ya kupimiwa ubora wake.
Akizungumza katika ziara aliyoifanya kutembelea miradi inayotekelezwa na Mamlaka hiyo leo Aprili 9, Ofisa Mtendaji Mkuu wa Dawasa mhandisi Cyprian Luhemeja amesema lengo ni kuhakikisha maji yanayotumiwa na wakazi wa eneo la huduma yanakuwa safi na salama.
Amesema kwa mujibu wa sheria hairuhusiwi kusambaza maji katika eneo la huduma la mamlaka hiyo bila kuwa na leseni.
“Tumeanza kuvitambua visima vyote vinavyotoa huduma ya maji na kupima maji yake bure ili wakazi wapate maji safi na salama,” amesema Luhemeja.
Amesema kwa sasa watu 10700 wanatumia maji ya visima na kwa kupima maji yake itasaidia kuondoa kabisa changamoto ya magonjwa ya mlipuko.
