Na Esther Mnyika, Mtanzania Digital
Jumuiya ya Mamlaka za Usimamizi wa Usafiri Majini Barani Afrika zimetakiwa kushirikiana na kuungana ili kuboresha usalama wa usafiri majini na kuchochea maendeleo ya kiuchumi katika mataifa wanachama.
Wito huu umetolewa leo, Novemba 29, 2024, na Naibu Waziri Mkuu na Waziri wa Nishati, Dk. Doto Biteko, wakati akifungua Kongamano na Mkutano Mkuu wa mwaka wa Jumuiya hiyo unaoendelea jijini Dar es Salaam kwa siku tatu.
Katika hotuba yake, Dk. Biteko alisisitiza umuhimu wa mkutano huo kuwa fursa kwa wadau wa sekta hiyo kubuni na kupanga mikakati ya muda mrefu itakayowezesha ustawi wa usafirishaji majini.
“Tunahitaji kuimarisha ushirikiano wa kikanda kwa lengo la kushughulikia changamoto kama uchafuzi wa mazingira, usalama wa safari za majini, na ukosefu wa usawa wa kijinsia,” alisema.
Aliwaasa washiriki kujiwekea malengo yatakayosaidia kuboresha usafiri wa majini, akiongeza kuwa sekta hiyo ni mhimili muhimu wa maendeleo ya uchumi.
IMO yapongeza Tanzania kwa kuwa mwenyeji
Katibu Mkuu wa Shirika la Kimataifa la Masuala ya Baharini (IMO), Arsenio Dominguez, alisifu Tanzania kwa kuwa mwenyeji wa mkutano huo, akisema ni ishara ya dhamira yake ya kuimarisha sekta ya usafiri majini.
“IMO itaendelea kuunga mkono juhudi za kuboresha usafiri majini, hasa kupitia programu za kimataifa zinazolenga hifadhi ya mazingira na usawa wa kijinsia,” amesema Dominguez.
Aliendelea kufafanua kuwa wanawake bado wapo nyuma katika sekta ya usafiri majini na kwamba IMO inaweka mkazo maalum kuhakikisha ushiriki wa kijinsia unaboreshwa ili kuongeza tija na ufanisi wa sekta hiyo.
Mkazo wa Tanzania katika miradi mikubwa
Waziri wa Uchukuzi, Profesa Makame Mbarawa, alitaja maendeleo makubwa yanayofanywa na Tanzania katika sekta hiyo, ikiwa ni pamoja na utekelezaji wa miradi ya kimkakati kama uboreshaji wa Bandari ya Dar es Salaam na ujenzi wa Reli ya Umeme (SGR).
“Miradi hii haiongeza tu ufanisi wa usafirishaji wa mizigo na abiria, bali pia inapunguza uchafuzi wa mazingira kwa kupunguza utegemezi wa usafiri unaotegemea mafuta,” amesema Profesa Mbarawa.
Aidha, alisisitiza umuhimu wa kuwekeza katika rasilimali watu, hasa vijana, ambao wanaweza kuchangia uendelevu wa sekta ya usafiri majini katika Afrika.
Mkuu wa Wilaya ya Ilala, Edward Mpogolo, akimwakilisha Mkuu wa Mkoa wa Dar es Salaam, alimshukuru Rais Dk. Samia Suluhu Hassan kwa kuimarisha miundombinu ya Bandari ya Dar es Salaam.
“Kwa sasa, msongamano bandarini umepungua kwa kiasi kikubwa, hali inayorahisisha shughuli za kupakia na kupakua mizigo,” alisema Mpogolo.
Aliongeza kuwa maboresho hayo yamechangia kwa kiasi kikubwa kuboresha ufanisi wa bandari hiyo, ambayo ni lango kuu la biashara kwa mataifa ya ukanda wa Afrika Mashariki na Kusini mwa Jangwa la Sahara.
Mkutano huo unatarajiwa kujadili changamoto na fursa zinazohusu usafiri wa majini barani Afrika, huku washiriki wakijitahidi kutafuta njia bora za kushirikiana na kuimarisha sekta hiyo. Pamoja na changamoto zilizopo, matumaini yako juu kuwa mikakati itakayobuniwa italeta mabadiliko chanya kwa sekta ya usafiri majini katika bara hili.
