Polisi ya Somalia imesema imetibua njama ya shambulizi la kigaidi lililokuwa limepangwa kufanywa mjini Mogadishu mkesha wa kuanza kwa mwezi wa Ramadhani hapo jana.
Naibu kamanda wa polisi Zakia Hussein Ahmed amesema afisa mmoja wa polisi ameuwawa baada ya kifaa kilichokuwa kimetegwa kwenye basi kuripuka wakati walipokuwa wakijaribu kukitegua.
Mripuko huo ambao ulitokea karibu kilomita 15 kusini mwa Mogadishu, umesikika katika mji huo mkuu.
Haijajulikana ni nani aliyehusika na kukitega kifaa hicho wala hakuna aliyetiwa nguvuni. Ulinzi umeimarishwa katika mjio huo mkuu wa Somalia huku mwezi wa Ramadhani ukiwa unaanza rasmi hii leo.
