Na Veronica Romwald – Dar es Salaam
Hali ya ujauzito na kitendo cha kuvuja damu nyingi wakati wa kujifungua zimetajwa kuwa sababu zinazochangia wanawake kuugua magonjwa ya figo.
Naibu Waziri wa Afya, Maendeleo ya Jamii, Jinsia, Wazee na Watoto, Dk. Faustine Ndugulile amesema hayo leo Machi 10, kwenye Maadhimisho ya Siku ya Figo Duniani.
“Magonjwa ya kisukari na shinikizo la damu nayo huchangia zaidi magonjwa haya, ikiwamo ulaji mbovu na kutokufanya mazoezi,” amesema.
Amesema ili kuwezesha wananchi kupata huduma ya kusafisha nchini serikali imeongeza vituo na kufikia jumla ya 17.
“Mgonjwa wa figo hawezi kuishi ikiwa hasafishwi damu (dialysis), zamani mtu alikuwa akiugua magonjwa haya anakufa lakini tukaweka juhudi na kuongeza huduma hii kwenye hospitali za serikali na za binafsi,” amesema.
