Na RAMADHAN HASSAN-DODOMA
WAFANYABIASHARA katika soko la Bonanza la mkoani hapa wanalazimika kujisaidia katika nyumba jirani na soko hilo kutokana na soko hilo kukosa vyoo.
Akizungumza na MTANZANIA mjini hapa jana, Mwenyekiti wa soko hilo, Goha Magwayi alisema soko hilo lina jumla ya wafanyabiashara 500 ambao wamekuwa wakiteseka kutokana na kukosa huduma hiyo.
Alisema Halmashauri ya Manispaa ya Dodoma ilitenga zaidi ya Sh milioni 10 kwa ajili ya ujenzi wa choo miaka sita iliyopita lakini hadi sasa choo hicho ujenzi umesimama.
“Hapa tuko wafanyabiashara wa samaki, matunda na mbogamboga, Serikali inatuangalia tu kikitokea kipindupindu wanakuja na kuuliza sababu ni nini wakati ukweli upo wazi hakuna vyoo.
“Manispaa ndiyo hatuielewi kabisa tunahisi kuna wajanja wamepiga fedha kupitia ujenzi wa hiki choo, kwa nini tuumie sisi,” alisema.
